- Readgujarati.com - http://archive.readgujarati.in/sahitya -

રેશમી ક્ષણ – ડૉ. રશીદમીર

[ તાજેતરમાં વડોદરામાં રહેતા ગઝલકાર શ્રી રશીદભાઈને મળવા જવાનું થયું. તેમની આ મુલાકાતમાં કેટલીક ગઝલો સાંભળવાનો લ્હાવો તો મળ્યો જ, તે સાથે સાથે તેમની પાસેથી હમણાં તાજી જ લખાયેલી એક ગઝલ મેળવવાનું સદભાગ્ય પ્રાપ્ત થયું. તેઓ શ્રીએ ‘Aesthetics of Ghazals’ વિષય પર PH.D. કરેલ છે. રીડગુજરાતીને આ સુંદર કૃતિ આપવા બદલ તેમનો ખૂબ ખૂબ આભાર.]

એમના પણને સાચવી લઈએ,
રેશમી ક્ષણને સાચવી લઈએ.

મૃગજળોનો ભરમ રહી જાએ,
એમ કૈં રણને સાચવી લઈએ.

આપમેળે થશે ખુલાસાઓ,
પહેલાં સગપણને સાચવી લઈએ.

એ જ અસલી છે આપણો ચહેરો,
એ જ દર્પણને સાચવી લઈએ.

તે પછીથી નિરાંતે ભીંજાશું,
ઓણ શ્રાવણને સાચવી લઈએ.

સ્વર્ગ ચાલીને આવશે સામે,
માના ધાવણને સાચવી લઈએ.

‘મીર’ પોતાને ખોઈ બેસીને,
માત્ર એક જણને સાચવી લઈએ.