- Readgujarati.com - http://archive.readgujarati.in/sahitya -

હૈયામાં ચોમાસું – મુકેશ જોષી

છોકરીના હૈયામાં ચોમાસું બેઠુ ને,
            છોકરાના હૈયે લીલોતરી
કૂંપળ ફુટયાની વાત જાણીને છોકરો
            છાપે છે મનમાં કંકોતરી

છોકરાએ મનમાં સગાઈ કરી
            છોકરીને ભેટમાં દીધેલું ઝાપટું
ખિસ્સામાં માય નહીં, છાતીમાં
            મૂકે તો છોકરાને દર્દ થાય સામટું
છોકરાના હાથોમાં જાણે કે છોકરીએ
            વરસાદી રેખાઓ કોતરી….છોકરીના

છોકરીના કેશમાંથી ઝરતાં ટીપાંઓથી
            શ્રી ગણેશાય લખી નાખ્યું
મેઘધનુષ નામના મુહૂર્તમાં છોકરાએ
           ફેરા ફરવાનુંય રાખ્યું
ગંગાને શોધતાં છોકરાને હાથ જાણે
            લાગી ગઈ આખી ગંગોતરી…છોકરીના