- Readgujarati.com - http://archive.readgujarati.in/sahitya -

ગઝલત્રયી – શૈલેષ પંડ્યા ‘ભીનાશ’

[ અભ્યાસે એમ.એ (અંગ્રેજી) તેમજ વ્યવસાયે શ્રી અરવિંદ મીલ્સના ‘રિસર્ચ ઍન્ડ ડેવલપમેન્ટ’માં કૉ-ઑર્ડિનેશન સંભાળતા શ્રી શૈલેષભાઈ (કલોલ) પોતાની પ્રત્યેક ગઝલમાં એક અનોખી ‘ભીનાશ’ લઈને આવે છે. તેમની ગઝલોએ કાવ્ય સંમેલનોમાં ખૂબ જ દાદ મેળવી છે. રીડગુજરાતીને આ સુંદર ગઝલો મોકલવા માટે શ્રી શૈલેષભાઈનો ખૂબ ખૂબ આભાર. આપ તેમનો આ સરનામે bhinash@gmail.com પર સંપર્ક કરી શકો છો.]

[1] સમયની કોઈ રગ નથી

મારી અધૂરી વારતા અમથી અલગ નથી
આભાસ એવો છે ધરા પર ક્યાંય પગ નથી.

સમજી ગયો છું આપણું જીવન પ્રવાસ છે
પકડી બતાવું પણ સમયની કોઈ રગ નથી.

સંબંધમાં સંવાદ તો પથરાઈ પણ ગયો,
ઉચ્ચારવા જેવી હૃદયની ખાસ વગ નથી.

આકાર ઝળહળતો બતાવું યાદ કર મને,
હું રોજ રાત્રે સળગી જાઉં એવી શગ નથી.

સારું થયું તેં સાચવી લીધી સવારને,
ચંચળ છે મન, આ સાંજ પણ મારી અડગ નથી.


[2] હું વાત માંડુ તો

કારણ વગર છલકે હજી ખોબો ભરી-ભરી
હું વાત માંડુ તો રડે આંખો ફરી-ફરી.

પાછું મને લૈ ભાગવું છે ક્યાં દીવાલને ?
પૂછ્યું હતું મેં બારણું આડું કરી-કરી.

રંગો ફરે છે હાથમાં પીંછી લઈ સતત,
બેસી રહે છે યાદ પણ દશ્યો ધરી-ધરી.

તારી અસરથી છૂટવાનું કામ ક્યાં સરળ…?
સંવેદના પણ ફૂટતી કાયમ ખરી-ખરી.

ભીતર ગયો છું ત્યારથી તૃપ્તિ થઈ ગઈ,
ડુબી જવાનું આવડ્યું નાહક તરી-તરી.

[3] ક્યાં તોય સૌની આંખમાં…

મારી હયાતી રોજ તારી આસપાસ છે.
તું શોધ તારા રક્તમાં મારો જ શ્વાસ છે.

વાતાવરણને જોઈ હું લઉં છું રડી જરા,
મારા બધાયે ઓરડે સૂકું જ ઘાસ છે.

નાહક નફા-નુકશાનનો કાયમ હિસાબ કર,
મારી વ્યથામાં ક્યાં કશું તારાથી ખાસ છે !

ક્યારેક પ્યાસાની નજરથી એને જોઈ લે,
દરિયો એ બીજું કૈં નથી મૃગજળનો ભાસ છે.

અંતિમ સમયમાં સાથ કેવળ સૂનકાર છે.
ક્યાં તોય સૌની આંખમાં આજે ‘ભીનાશ’ છે…?