- Readgujarati.com - http://archive.readgujarati.in/sahitya -

સમજ – મહેન્દ્ર જોશી

હાથથી છૂટ્યું એ તો છૂટ્યું સમજ
એક વાસણ કાચનું ફૂટ્યું સમજ !

અર્થ ખુશ્બૂનો એવો તે શો થયો,
પુષ્પને ક્યાં કોઈએ ચૂંટ્યું, સમજ !

સાતમા માળે મળ્યું એક સરનામું,
સ્વપ્ન ત્યાં પહોંચ્યું, દડ્યું, તૂટ્યું સમજ !

બસ અહીંથી ઊઠીને ત્યાં જઈ બેઠો,
આમ જો તો ક્યાં કશું ખૂટ્યું સમજ !

તેં સમજના દ્વાર પણ વાસી દીધાં,
મેં નર્યા એકાંતને ઘૂંટ્યું સમજ !

માવજત તું વાટની કરતો રહ્યો,
કોડિયે દીવેલ પણ ખૂટ્યું સમજ !

ઝેર તો પગમાં સફરનું પણ હતું,
શિર ભલા ક્યા કારણે ફૂટ્યું ? સમજ !