- Readgujarati.com - http://archive.readgujarati.in/sahitya -

મોરલો બોલ્યો રે…. – લોકગીત

મોરલો બોલ્યો રે મારા મૈયરનો.
મારા મૈયરનો, મારા પિયરનો….. મોરલો…

મોરલા સરવો તારો સાદ, મોરલો
મોરલો બોલ્યો રે મારા મલકનો.

મોરલા તું રોકા તો ઉતારા ઓરડા,
મોરલા તું ને આલું મેડીના મોલ…. મોરલો….

મોરલો બોલ્યો રે મારા મલકનો,
મોરલા તું રોકા તો ભોજનલાપશી,
મોરલા તું હાલે તો કઢિયલ દૂધ… મોરલો….

મોરલા તું રોકા તો પોઢણ ઢોલિયા,
મોરલા તું ને કરું મારો મે’માન… મોરલો…

મોરલો બોલ્યો રે મારા મલકનો,
મોરલા તારી સોને મઢાવું ચાંચ,
મોરલા તારી રૂપે મઢાવું પાંખ રે…. મોરલો….

મોરલો બોલ્યો રે મારા મલકનો.
મોરલા તારે રૂડો રૂપાળો કંઠ છે.
મોરલા તારો ગરવો લાગે મને સાદ રે…. મોરલો….