બાળકાવ્યો – સંકલિત

[1] નાચે તાતા થઈયા ! – રમેશ ત્રિવેદી

કોણે આ આકાશ ચીતર્યું
ચાંદો-સૂરજ-તારા,
કોણે વન વન ઉપવન સર્જ્યાં
ફૂલના રંગ-ફુવારા ?

કોણે સર્જ્યાં ઝાકળ મોતી
કીડી-કેરી આંખો,
કોણે સર્જ્યાં ઝરણાં-હરણાં
પતંગિયાની પાંખો ?

ચીતર્યા કોણે મેઘધનુ શા
રંગબેરંગી મોર,
મધમીઠાં આ સર્જ્યા કોણે
કોકિલના કલશોર ?

છમ્મલીલી આ ધરતી
રંગરંગ વાદળીઓ,
કોણે ચીતર્યો જુઓ મોજથી
વહાલભર્યો આ દરિયો ?

કોણે સર્જી માવડી –
ઘરઘર બાળ કનૈયા,
નેહ ભરેલાં નયણાંર સામે
નાચે તાતા થઈયા !
.
[2] સૌને ગમે – ઝીણાભાઈ દેસાઈ ‘સ્નેહરશ્મિ’

મારા બારણાને ટોડલે ચકલી રમે,
એની ઝીણી ઝીણી આંખ,
એની નાની નાની પાંખ,
એ તો રમતી ને ઊડતી સૌને ગમે.

મારા ફળિયાને લીમડે પોપટ રમે,
એની ગોળ ગોળ આંખ,
એની લીલી લીલી પાંખમ
એ તો બોલતો ને ઊડતો સૌને ગમે.

મારા ઘરને તે આંગણે વાછરું રમે,
એના સુંવાળા વાળ,
એની થનગનતી ચાલ,
એ તો નાચતું ને કૂદતું સૌને ગમે.

મારી નાનકડી બેન મારા ઘરમાં રમે,
એની કાલી કાલી બોલી,
એની આંખ ભોળી ભોળી,
એ તો રમતી ને હસતી સૌને ગમે.

સૌને ગમે, સૌને ગમે,
ઘર મારું નાનું સૌને ગમે !
.
[3] હીંચકો – વિનોદ જાની

વડલાની ડાળે બાંધ્યો છે હીંચકો,
હીંચકો ખાવાની ભાઈ આવે મજા,
ભાઈ કેવી મજા !

બેસવાને દોડી જાઉં સૌથી હું પ્હેલો,
ઝુલાવે દોસ્તો મારીને ઠેલો,
ગબડી જવાની ભાઈ આવે મજા,
ભાઈ કેવી મજા !

પૉરો લેવાને પથિક આવે,
વિશ્રાન્તિ દૈ તું તાજા બનાવે,
ઝૂલવાનું ના એ ભૂલે કદા,
ભાઈ કેવી મજા !

આંબલી-પીપળી કદીક રમતા,
ઝૂલતાં ટેટા શિર પર પડતા,
મજાની સાથ ભાઈ એ તો સજા,
ભાઈ કેવી મજા !
.
[4] વાંદરભાઈને ઓરી નીકળ્યાં – ડૉ. આઈ. કે. વીજળીવાળા

વાંદરભાઈને ઓરી નીકળ્યાં, હળવે હળવે બોલે રે !
તાવ, ઉધરસ ને થાય છીંકાછીંક, ઘેનમાં એ તો ડોલે રે !

લોમડી ડોશી પાડોશણ તે, તબિયત જોવા આવી રે !
સૂંડલો એક લીમડાનાં ડાળખાં, સાથે લેતી આવી રે !

શિખામણ સેંથકની આપે, બહાર ના ક્યાંય જાશો રે !
ઓંછાયો તો પડશે, બાપા ! પાછળથી પસ્તાશો રે !

ખાવા-પીવાની ના પાડીને ડોશીમા તો જાતાં રે !
વાંદરભાઈ તો નબળા થઈ ગ્યા, ભૂખેથી પીડાતા રે !

ડોક્ટર હાથીભાઈને કાને, વાત આ કોઈએ નાખી રે !
હાથીભાઈને ખીજ ચડી, આ લોમડીની બદમાશી રે !

વાંદરભાઈને સૌએ જઈને, નવડાવ્યા ધોવડાવ્યા રે !
પાણી તાજું પીવડાવ્યું ને, ફળ-ફૂલો ખવડાવ્યાં રે !

ઓંછાયો તો કાંઈ પડે નહીં, સૌએ ખૂબ સમજાવ્યા રે !
લોમડી વ્હેમ ફેલાવે ખોટા, કહી એમને મનાવ્યા રે !

વાંદરભાઈ તો સારવાર લઈને, જલદીથી થાય સારા રે !
વનમાં સૌ કોઈ વાત કરે કે, લોમડીબાઈ નઠારાં રે !

Print This Article Print This Article ·  Save this article As PDF

  « Previous ઝૂમણાની ચોરી – ઝવેરચંદ મેઘાણી
આદર્શ બાલમંદિર – ગાંધીજી Next »   

15 પ્રતિભાવો : બાળકાવ્યો – સંકલિત

  1. સુંદર બાળકાવ્યો. મજા પડી.

  2. gopal parekh says:

    રસભર બાળકાવ્યો

  3. pragnaju says:

    બાળક સ્વભાવના મોટાને પણ ગમે તેવી રચના

  4. harubhai karia says:

    બ|લ ગ્?ત બહુ ગમુચે. હર્દિક અભિનન્દન્.

  5. Paresh says:

    સુંદર બાળ કાવ્યો. ડૉક્ટર સાહેબ બાળગીતો પણ સારા લખે છે! આભાર

  6. nayan panchal says:

    બાળકોની કલ્પનાશક્તિને ખીલવતા સરસ મજાના બાળકાવ્યો.

    આભાર,
    નયન

  7. વાહ, ભઈ વાહ… મજા આવી ગઈ… સુંદર બાળગીતોનું મજાનું સંકલન…

  8. ભાવના શુક્લ says:

    ખુબ અદભુત બાળગીતો અને એમા વિજળીવાળા સાહેબે તો ઉટવૈદા લોમડી બહેનની સરસ ખબર લઈ નાખી. બાળગીતના નામ પર એક સાચી સમજનો આ જ રીતે વિકાસ સરસ…

  9. Utkantha says:

    ખૂબ સરસ…

નોંધ :

એક વર્ષ અગાઉ પ્રકાશિત થયેલા લેખો પર પ્રતિભાવ મૂકી શકાશે નહીં, જેની નોંધ લેવા વિનંતી.