- Readgujarati.com - http://archive.readgujarati.in/sahitya -

નિર્મિશીકરણ : ગુજરાતી ગઝલકારોનું – નિર્મિશ ઠાકર

[રીડગુજરાતી પર આપણે સાહિત્ય, ફોટોગ્રાફી અને સંગીતથી લઈને જુદી જુદી કલાઓને પોંખીએ છીએ. જેમાં આજે વારો છે ‘ઠઠાચિત્રોનો’ એટલે કે ‘Caricatures’નો. ઠઠાચિત્ર કલાનો એક વિશાળ આયામ છે. કોઈ પણ વ્યક્તિનું ઠઠાચિત્ર તેના સમગ્ર વ્યક્તિત્વ વિશે ઘણું કહી જાય છે. થોડીક રમૂજ સાથે તે અર્થસભર સંદેશો આપતું હોય છે. થોડામાં ઘણું સમજાવી જતી આ કલાને આજે આપણે નિર્મિશભાઈના હસ્તે માણીશું. તેમના હાસ્યલેખોથી તો આપણે સૌ કોઈ પરિચિત છીએ જ. આ ઉપરાંત તેઓ ખૂબ સારા કાર્ટૂનિસ્ટ, સંગીતકાર, ગઝલકાર, કવિ અને હાસ્ય-નવલકથાકાર પણ છે. આજે તેમની બહુમુખી પ્રતિભાના એક વધુ પ્રકારનો પરિચય મેળવીએ. રીડગુજરાતીને આ પુસ્તક ભેટ મોકલવા માટે તેમનો ખૂબ ખૂબ આભાર. આપ નિર્મિશભાઈનો (સુરત) આ સરનામે સંપર્ક કરી શકો છો : nirmish1960@yahoo.com પુસ્તક પ્રાપ્તિની વિગતો ચિત્રોના અંતે આપવામાં આવી છે. – તંત્રી.]

[1] કલાપી (1874-1900)

જ્યાં જ્યાં નજર મારી ઠરે યાદી ભરી ત્યાં આપની;
આંસુ મહીં એ આંખથી યાદી ઝરે છે આપની !

[2] બરકત વીરાણી ‘બેફામ’ (1923-1994)

‘બેફામ’ તોયે કેટલું થાકી જવું પડ્યું ?
નહીં તો જીવનનો માર્ગ છે ઘરથી કબર સુધી

[3] ભગવતીકુમાર શર્મા (1934)

વાલ્મીકિના હૃદયમાં સ્ફુરેલો હું શોક છું,
કિન્તુ ન જે રચાઈ શક્યો એવો શ્લોક છું.

[4] જલન માતરી (1934)

શ્રદ્ધાનો હો વિષય તો પુરાવાની શી જરૂર ?
કુરઆનમાં તો ક્યાંય પયંબરની સહી નથી.

[5] ચીનુ મોદી (1939)

કાપ કરવત કાપ મારા આંગળાંની છાપને
હું કબૂલું છું ગુલાબો ચૂંટવાનાં પાપને

[6] રાજેન્દ્ર શુક્લ (1942)

સમાઈ ક્યાં શકું છું હું નગરમાં કે મહાલયમાં ?
ગુહા જેવું ગહન કાંઠે મને ગિરનાર સંઘરશે.

[7] મનોજ ખંડેરિયા (1943-2004)

પકડો કલમ ને કોઈ પળે એમ પણ બને
આ હાથ આખેઆખો બળે એમ પણ બને

[8] રાજેશ વ્યાસ ‘મિસ્કીન’ (1955)

હવે ‘મિસ્કીન’ છોડી દે નકામો મોહ શબ્દોનો,
હતી કહેવા સમી જે વાત એ શબ્દો વગર ચાલી

[9] શોભિત દેસાઈ (1956)

વેર લેવાનો નવો રસ્તો કહું
શત્રુ ઉપર એક બીજો ઉપકાર કર !

[10] નિર્મિશ ઠાકર (1960)

શબ્દકોશોમાં જ જે બે-ચાર અર્થો સાચવે,
નિર્મિશાત્મકતા વિનાનાં નામ મારે ના ખપે !

[કુલ પાન : 100. (મોટી સાઈઝ). કિંમત રૂ. 110. પ્રાપ્તિસ્થાન : રન્નાદે પ્રકાશન, 58/2 બીજે માળે, જૈન દેરાસર સામે, ગાંધી રોડ, અમદાવાદ-380001. ફોન : +91 79 22110081-64]