- Readgujarati.com - http://archive.readgujarati.in/sahitya -

બે પદ્યરચનાઓ – શોભિત દેસાઈ

[‘અહમ ઓગાળવા આવ્યા’ પુસ્તકમાંથી સાભાર.]

[1] મત્ત પાગલ પ્રેમમાં

આપણું પોતાનું જીવન ધન્ય થઈને જીવીએ !
શા માટે આપણે કો અન્ય થઈને જીવીએ ?

ફકત ખુદ ખાતર જીવી લેવું, નથી એ જીવવું,
ક્યાંક તો…. ક્યારેક તો…. પર્જન્ય થઈને જીવીએ !

પૂર્ણતા છે કૈંક બાકી રહી ગયાની લાગણી,
થોડા બનીએ રણના, થોડા વન્ય થઈને જીવીએ !

ખોળીએ ખુવાર થઈ જાવાને લાયક પાત્રને,
મત્ત પાગલ પ્રેમમાં ચૈતન્ય થઈને જીવીએ.

અંત પણ આરંભની જેવો જ રોનકદાર હો,
સહેજ પણ ઈચ્છા નથી મૂર્ધન્ય થઈને જીવીએ.
.

[2] પૂર્વમાં જો !

લક્ષ દુર્લભ નિશાનનું રાખો,
દ્રષ્ટિ રાખો મળી જશે આંખો.

ચાંદ ગણવાનું તારું કામ નથી,
તારલા તું ભલે ગણે લાખો.

ચૂંટતાં તેં ચૂંટી લીધી છે કળી,
બાગ રડમસ, ઉદાસ છે આખો

વાત બચ્ચાની તો ઊતરશે ગળે,
સાંભળો પણ ખરા અને ચાખો.

આ તિમિર તો પૂરું થવામાં છે,
પૂર્વમાં જો ! ફૂટી રહી પાંખો.