- Readgujarati.com - http://archive.readgujarati.in/sahitya -

મુજને અડશો મા ! – દયારામ

‘મુજને અડશો મા ! આઘા રહો અલબેલા છેલા ! અડશો મા !
અંકભર્યાના સમ ખાઓ તો અધર તણો રસ પાઉં;
કહાનકુંવર ! કાળા છો, અડતાં હું કાળી થઈ જાઉં !’ મુજને…

‘તું મુજને અડતાં શ્યામ થઈશ તો હું ક્યમ નહિ થાઉં ગોરો ?
ફરી મળતાં રંગ અદલાબદલી, મુજ મોરો, તુજ તોરો !’ મુજને….

‘કાળી થયાનું કામ નથી, પણ લગ્ન લોકમાં ઠરશે;
લઘુ વયમાં લાંછન લાગ્યાથી બીજો વર ક્યમ વરશે ?’ મુજને….

‘તારે બીજા વરનું કામ શું છે ? હું વર, તું વહુ ધન્ય !
જેનું લાંછન તેને વરિયે તો તો માન મળે અનન્ય.’ મુજને….

સૂણી એમ હરિવદની હસી ભેટ્યાં, પ્રતિઉત્તર ના દીધો;
હોળીની હાંસી મિશે દયાપ્રીતમ બેએ આનંદરસ લીધો. મુજને….