- ReadGujarati.com - http://archive.readgujarati.in/sahitya2 -

એવું ય કંઈ નથી – મકરંદ મુસળે

વાત મારી માનશે એવું ય કંઈ નથી,
આમ પણ મારે હવે કે’વુંય કંઈ નથી.

કંઈ નથી તારી કને જાણી ગયો છું હું,
તારી પાસેથી ખુદા લેવું ય કંઈ નથી.

આમ પોતાનો નથી ગણતા મને કદી,
આમ પાછું પારકા જેવું ય કંઈ નથી.

આંખ તારી મારું સરનામું બની ગઈ,
ઈંટ પથ્થરમાં હવે રે’વુંય કંઈ નથી.

મારી મુઠ્ઠીમાં હશે દુનિયા મને હતું,
જેવું મેં ધાર્યું હતું એવુંય કંઈ નથી.