- ReadGujarati.com - http://archive.readgujarati.in/sahitya2 -

ઘંટીપડ – ચંદ્રકાન્ત ટોપીવાળા

ઘર માતની ગોદના સમું,
ઘર ખૂંદું ઘરમાં ઘૂમ્યા કરું.
ઘર ફુલ્લ ગુલાબ જોઈ લ્યો,
ઘર સૂંઘું ઘર શ્વાસમાં ભરું.

ઘર બ્હાર યદા હું નીસરું,
ઘર રહેતું બસ ખેંચતું મને.
ઘરમાં પગ મૂકું ના મૂકું,
ઘર બાઝે હળવું હવા સમું.

ઘરથી કદી દૂર હોઉં તો,
ઘર વાગે ઉરઘંટડી સમું.
ઘર ડોક પડ્યું ઘરેણું છે,
ઘર તો માદળિયું ઝૂલ્યા કરે !

ઘર હાલ્યું ધરા જરા ધ્રૂજી,
ઘર ઘંટીપડ થૈ ગળે પડ્યું !