- ReadGujarati.com - http://archive.readgujarati.in/sahitya2 -

બાળકાવ્યો – સંકલિત

[1] ઉનાળાનો તડકો – ડૉ. આઈ. કે. વીજળીવાળા

ઉનાળાનો કેવો તડકો,
જાણે ધોળો-ધોળો ભડકો !

શેરી રસ્તા ખાલીખમ, ને
પહોળી પહોળી લાગે સડકો.

બપોરના સૌ ઘરમાં બંધ,
લૂ લાગવાનો સૌને ફડકો.

પાણી છાંટો ઘરમાં બારે,
માથે ઠંડા પોતાં ખડકો !

લીંબુ-શરબત છાશ પીઓ સૌ,
કેરી રસનો લો સબડકો !

વાદળ લાવે, વરસાદ લાવે,
તેથી ગમતો અમને તડકો !
.

[2] મધમાખ – ન્હાનાલાલ કવિ

ફૂલ-ફૂલમાં હું ઊડતી ફરું,
ફૂલની રજ મુજ પૂડલે ભરું.

શોધું વાડી વન ને કુંજ,
માંડું મહીં હું ગુંજગુંજ

ગાઉં ઝીણું ને ઊંડું જોઉં,
અમૃત જેવું મધ હું દહોઉં.

મુજ ફૂલ-માખણ લોકો લહે,
લોકો મ્હને ઉદ્યોગી કહે.

રસિયાં જનનાં રસિયાં વેણ,
મધ-શાં મીઠડાં એમનાં કહેણ.

ફૂલનો સત્સંગ નિત્ય હું કરું,
સત્સંગના સાર સહુને ધરું.