- ReadGujarati.com - http://archive.readgujarati.in/sahitya2 -

કાચા કોડિયે – નંદુકુમાર પાઠક

[ ‘ગુજરાતી નવનીત : ધોરણ-10’ માંથી સાભાર.]

કાચા આ કોડિયે મૂકેલો
……….હો દીવડો, કાચા આ કોડિયે મૂકેલો.

સૂરજનાં અજવાળાં એમાં સજાયાં,
શશિયરનાં શીતળ જો કિરણો સમાયાં,
ગેબી કો ગોખમાં મૂકેલો
……….હો દીવડો, કાચા આ કોડિયે મૂકેલો.

વર્ષાની વાદળીઓ આવે ને આંતરે,
અંધારાં અવનીનાં આવે ને આવરે,
ઝંઝાના વીંજણે ઝગેલો
……….હો દીવડો, કાચા આ કોડિયે મૂકેલો.

સંતનનાં નયનોની કીકીમાં ડોલતો,
દુખિયારી આંખોની ખીણોમાં ઓપતો,
સોહે અનેકમાં એકલો
……….હો દીવડો, કાચા આ કોડિયે મૂકેલો.