- ReadGujarati.com - http://archive.readgujarati.in/sahitya2 -

અડકો દડકો – લતા ભટ્ટ

[ જાણીતા અખબારો અને સામાયિકોમાં ટૂંકીવાર્તા, લઘુકથા, નિબંધ, કાવ્યો લખતાં શ્રીમતી લતાબેનના બાળકાવ્યોના કેટલાંક પુસ્તકો પૈકીનું આ ‘અડકો દડકો’ એક પુસ્તક છે. રીડગુજરાતીને આ પુસ્તક ભેટ આપવા બદલ લતાબેનનો (વડોદરા) ખૂબ ખૂબ આભાર. આપ તેમનો આ નંબર પર +91 9998983815 અથવા આ સરનામે meera148@gmail.com સંપર્ક કરી શકો છો.]

[1] બિલ્લી

એક હતી બિલ્લી,
ગઈ એ તો દિલ્લી.

દિલ્લીમાં મળ્યા બે બગ,
હતા એ તો પૂરા ઠગ.

બિલ્લીને આવી કહેતા,
બનાવીએ તને નેતા.

ધોવાં તારાં સઘળાં પાપ,
કરાવવા પડશે મંત્ર જાપ.

બિલ્લીએ આપી નોટ કડકડતી
બગ ઊડ્યા, મૂકી બિલ્લીને રડતી

[2] જોડકણાં

શાક વેચે શકરી,
પાસે ઊભી બકરી.

આપે શકરી ભાજી,
બકરી થાય રાજી.

શકરી કહે લે..લે…લે…
બકરી કહે બેં…બેં…બેં…
******

ચણ ચણે ચકલી,
ચણે ચોખાની ઢગલી.

ઢગલીમાં ઢૂવો,
ઊંડો ભમ્મરિયો કૂવો,

કૂવામાં દેડકી,
આવી એને હેડકી,

દેડકી કહે ડ્રાં…ઉં…
ગીત મજાનાં ગાઉં.

[3] બાએ બનાવી પૂરણપોળી

મોજથી ખાશું ભાઈબેનની ટોળી,
આજ બાએ બનાવી પૂરણપોળી..

પૂરણપોળીનો સ્વાદ અનેરો,
છંટકાવ થાય તેમાં કેસર કેરો;
કાજુ-બદામ ને પિસ્તાં-ચારોળી,
આજ બાએ બનાવી પૂરણપોળી.

પૂરણપોળી ખાઈ થાય મન પ્રસન્ન,
તોલે ન આવે એની કોઈ મિષ્ટાન્ન;
ખાશું એય ઘીમાં ઝબોળી,
આજ બાએ બનાવી પૂરણપોળી….

બા જમાડે સૌને, રાખી પ્રેમભાવ,
બાના હાથે જમવાનો લેવા લ્હાવ,
તમે ય આવજો, કદીક સમય ખોળી.
આજ બાએ બનાવી પૂરણપોળી….

[4] પાંજરે પોપટ

પાંજરે પોપટ એક પાંજરે પોપટ,
પઢાવેલું એ તો બોલે ફટફટ.

આવનારાંને કહે સીતારામ,
જનારાંને કરે એ રામ….રામ….
મરચું ને જામફળ ખાય પટપટ,
પાંજરે પોપટ એક પાંજરે પોપટ.

કહે ન કોઈને એ પોતાની કથા,
મુન્નાએ સમજી તોય એની વ્યથા;
ખોલ્યું પાંજરાનું દ્વાર ઝટપટ,
ઊડ્યો, એ જઈ બેઠો સરોવરને તટ…

[કુલ પાન : 60. કિંમત રૂ. 60. પ્રાપ્તિસ્થાન : લતા હર્ષદકુમાર ભટ્ટ, એ-1, નર્મદાનગરી સોસાયટી, વિભાગ-2 સહયોગ, વડોદરા-390016. ફોન : +91 9998983815. ઈ-મેઈલ : meera148@gmail.com ]