- ReadGujarati.com - http://archive.readgujarati.in/sahitya2 -

મૂક-બધિરોનું ગીત – મનોહર ત્રિવેદી

કોણ કહે છે કે ફૂલ નથી બોલતાં ?
વાત એની સાંભળીને હોંકારો આપતાં પાંદડાં પણ હોંશે હિલ્લોળતાં

ખળખળ વહીને પેલાં ઝરણાંઓ બોલે તો
ફૂલ નહીં રહેવાનાં ચૂપ
પાંખડીમાં જુદા જુદા રંગ બીજું શું છે ?
છે વાણીનાં જુદાં જુદાં રૂપ

ફૉરમનો આસપાસ એવો કલશોર કે બારણાં કૌતુકથી સૌ ખોલતાં

ઊંચે આકાશમાં તારાની ટોળકી
છાનીછાની માંડે છે વાત
એવું શું એણે એકબીજાને કીધું કે
હસી ઊઠ્યા બત્રીશે દાંત ?

ઝાડવાં પણ સાંભળતાં હોય એમ લાગે છે, અમથું કદી ન આમ ડોલતાં

આંગળીનાં ટેરવાંમાં મૂક્યો છે કંઠ
અમે આંખોમાં મૂક્યા છે કાન
ગમતું કૈં જોઈ જોઈ હોઠ જરી મલકે
તો એને કહેશો ન તમે ગાન ?

એમ જ આ બારસાખ ઓરડાઓ પાણિયારું ચૂલો ને ભીંત્યું કિલ્લોલતાં
કોણ કહે છે ફૂલ નથી બોલતાં ?