- ReadGujarati.com - http://archive.readgujarati.in/sahitya2 -

અજબ ગજબનું જંતર – લલિત વર્મા

[‘નવનીત સમર્પણ’માંથી સાભાર.]

અજબ ગજબનું જંતર કાયા અજબ ગજબનું જંતર,
વાદક છેડે તાર તો બોલે, નહીંતર મૂગું મંતર….કાયા…

શ્વાસ શ્વાસના તાર ને નાનો હૃદય નામનો ટેકો,
અદીઠ નખલી છેડે સૂર તો લયમાં ભળે છે ઠેકો,
મંદ્ર, મધ્ય, ને તારમાં વાગે, નખશિખ સૂરિલ નિરંતર
……………………………………………. અજબ ગજબનું જંતર….

તાર ચડે તો ચડત સૂરમાં, તાર ઢીલા તો બોદું,
તાર બરાબર મળે ન ત્યાં લગ મૂળ ષડજ ક્યાં શોધું ?
સાંગોપાંગ સમજમાં ના’વે, સૂરતાલનું તંતર
……………………………………………. અજબ ગજબનું જંતર….

તજો વિવાદી, વાદી, સંવાદીને લયમાં સાધી,
અલખ, અનાદિ નાદ સધાતાં લાગે સૂર સમાધિ,
ધીરે ધીરે ઘટે ‘લલિત’ અવ ખાલી, સમનું અંતર.
……………………………………………. અજબ ગજબનું જંતર….