- ReadGujarati.com - http://archive.readgujarati.in/sahitya2 -

પડછાયો – હરિહર જોશી

[‘શબ્દસૃષ્ટિ’ ફેબ્રુઆરી-2011માંથી સાભાર.]

થોડીવાર
આ પડછાયો અળગો થાય મારાથી
તો
વાતો કરી શકું તમારી સાથે પેટછૂટી.

સતત
મારા અંગરક્ષક જેવો સાથે ને સાથે હોય છે એ
મારી પ્રત્યેક હિલચાલ પર ચાંપતી નજર હોય છે એની.

અજવાસ હોય કે અજવાળિયું હોય
હું ક્યારેય એકલો નથી હોતો
મને ક્યારેક અકળામણ થાય છે એની
એ જાણે છેઃ
ક્યારે મોટા થવું
ક્યારે નાના

આમ તો
જડભરત માથાફરેલ છે.
મારું કહેવું ક્યારેય સાંભળતો નથી.
મારામાં,
મૂળ નાંખી વધતોઘટતો રહ્યો છે એ
એણે સ્વેચ્છાએ
એક લક્ષ્મણરેખા આંકેલી છે
મારા પગ સાથે ઘરોબો કેળવ્યો છે એણે
પોતાની મર્યાદા એ ક્યારેય ઓળંગતો નથી
પગના તળિયેથી ક્યારેય ઊફરો જતો નથી.
જરૂર પડ્યે
અમારી વચ્ચે પગરવની ભાષામાં વાતો થતી રહે છે.
હું ડોળઘાલુ, ખંધો, કે કૃત્રિમ બનું
ત્યારે કેવો લાગતો હોઈશ, એ પણ
ભજવી બતાવ્યું છે એણે.

આમ તો
મારા અસ્તિત્વ જેટલો જ અનિવાર્ય
પણ
તમે જ કહોઃ
દિવસરાત કોઈ જળોની જેમ ચોંટેલું રહે તો
અકળામણ થાય કે નહીં ?
શું કહો છો, બોલો !